Un karta pa Kòrsou

Un siudadano ku fe
Willemstad
Kòrsou
11 sèptèmber 2019

Mi Dushi Kòrsou,

Delaster tempu ku mi ta kòmbersando ku bo yunan mi a ripará ku hopi a bin pèrdè e palabra ku nos ta yama fe. Bo yunan a kuminsá pèrdè fe den yen komponente ku huntu ta forma e dushi isla ku nos tur stima kual ta abo. Bo yunan ta pèrdè fe den bo ekonomia, tin asta den bo gobièrnu, pero esun ku ta duel mi mas tantu, ta ku tin di bo yunan ta pèrdè fe den nan propio rumannan. E delaster kos ku bo yunan por pèrdè fe den dje, ta den nan rumannan (e pueblo). Ta bo pueblo ta forma bo i hasi bo e dushi isla ku bo ta. Ora mi sinta pensa riba esaki, mi ta ripará ku nos reto di mas grandi ku nos tin nos dilanti aworaki, ta pa restourá e Fe bèk den mi rumannan. Sí, mi ta bisa NOS pasó ta ami, abo i mi rumannan huntu tin ku hasié. 

Den un situashon manera esaki ta bon pa wak bèk riba algu ku tur bo yunan a siña i ta kanta ku orguyo for di chikitu kual ta nos himno. Pasó un himno ta loke e pais ta para p’e i loke e pais ta representá. Un parti ku sigur nos tin ku pone atenshon riba dje i biba mas tantu ta e di 3 i di 4 kuplèt den nos himno ku ta bisa asina’ki:

3.Nos pueblo tin su lucha,
ma semper nos tin fe
di logra den tur tempu
viktoria ku trabou!

4. Ban duna di nos parti
p'e isla prosperá.
Laga nos uni forsa
p'asina triunfá.

Ounke ku nos ta den un lucha, semper nos mester keda ku FE pasó ora nos duna di nos parti i uni forsa, kosnan hopi grandi i bunita ta sosodé. Ora mi wak kon Estados Unidos (Merka) a rekuperá for di un atake ku a destruí dos toren i kosta gran kantidat di bida, mi ta pensa ta kiko a pone nan rekuperá for di e gòlpi aki? E úniko kos ku mi por pensa ta FE i e gana den un mihó mañan. Medellin tambe a pasa den un temporada hopi difisil, pero awe nan ta un di mihó suidatnan na mundu, e transformashon aki tambe ta resultado di un pueblo desidido, ku FE i gana di un mihó mañan. Mi pais Kòrsou mi ta kue un ehèmpel riba bo mes, e transformashon di e dushi bario di Otrobanda, esaki tambe ta resultado di ora nos rumannan pone man na obra, kompartí e mesun vishon i ta biba bon ku otro. Asina tin hopi otro ehèmpel.

Ku esaki mi ke bisa mi rumannan di e dushi pais ku nos tur ta yama Kòrsou, ban keda ku FE den un mihó Kòrsou, pasó huntu nos ta para fuerte, ban duna di nos parti, ban kere den nos próhimo. Ban biba loke un Yu di Kòrsou ta para p’e i ban yuda den e manera ku nos por pa nos dushi pais Kòrsou bai dilanti.

Mi dushi pais Kòrsou, mi ta keda ku fe den bo, mi ta keda ku fe den mi rumannan, mi ta keda ku fe ku nos lo tin un mihó mañan, pasó e delaster kos ku nos por pèrdè komo un YU di Kòrsou Orguyoso ta FE. 


Atentamente,


Un Siudadano ku FE